မြန်မာ့ဂုဏ် သတင်းမီဒီယာ

ဒုတိယသမ္မတ ဒေါ်နန်းနီနီအေး မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ ပြင်ဆင်မှုများ ကြည့်ရှုစစ်ဆေး

နေပြည်တော်၊ အောက်တိုဘာ ၁၈

ဒုတိယသမ္မတ ဒေါ်နန်းနီနီအေးသည် ပြည်ထောင်စုဝန်ကြီး ဦးခင်မောင်စိုး၊ နေပြည်တော်ကောင်စီဥက္ကဋ္ဌ ဦးကံမြင့်သန်းနှင့် တာဝန်ရှိသူများလိုက်ပါလျက် ယနေ့မွန်းလွဲပိုင်းတွင် ၂၀၂၆ ခုနှစ် (၂၇) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ အောင်မြင်စွာကျင်းပနိုင်ရေး ပြင်ဆင်ဆောင်ရွက်ထားမှုများကို ကြည့်ရှုစစ်ဆေးပြီး လိုအပ်သည်များ မှာကြားခဲ့သည်။

ဒုတိယသမ္မတသည် ပြိုင်ပွဲကျင်းပမည့် MICC-I၊ အမျိုးသားစာကြည့်တိုက်၊ အမျိုးသားပြတိုက်၊ နေပြည်တော်တည်းခိုရေးစခန်းနှင့် မြို့တော်ခန်းမရှိ လေဟာပြင်ဇာတ်ရုံတို့၌ ခန်းမများ၊ မီးနှင့်အသံစနစ်များ၊ ကျန်းမာရေးစောင့်ရှောက်မှု၊ နေရာထိုင်ခင်း၊ စားသောက်ရေးနှင့် ပြိုင်ပွဲဝင်များအတွက် လိုအပ်သည့်အစီအမံများ ပြင်ဆင်ထားရှိမှုကို စစ်ဆေးခဲ့သည်။

ပြိုင်ပွဲဝင်များနှင့် အကဲဖြတ်ဒိုင်များ အဆင်ပြေစွာ နေထိုင်ယှဉ်ပြိုင်နိုင်ရေး၊ အခမ်းအနားနှင့် ပြိုင်ပွဲများ စနစ်တကျကျင်းပနိုင်ရေး၊ ကျန်းမာရေးနှင့် သန့်ရှင်းရေးလုပ်ငန်းများကို အလေးထားဆောင်ရွက်ရန် ဒုတိယသမ္မတက မှာကြားခဲ့သည်။

အဆိုပါပြိုင်ပွဲကို အောက်တိုဘာ ၂၁ ရက်မှ ၂၉ ရက်အထိ ကျင်းပသွားမည်ဖြစ်ပြီး တိုင်းဒေသကြီးနှင့် ပြည်နယ်များမှ ပြိုင်ပွဲဝင် ၂,၄၀၀ ကျော် ပါဝင်ယှဉ်ပြိုင်ကြမည်ဖြစ်ကြောင်း သိရသည်။
#Myanmagon

ပဲခူးတိုင်း တရားမဝင်ကုန်သွယ်မှုတိုက်ဖျက်ရေး လုပ်ငန်းညှိနှိုင်းအစည်းအဝေး ကျင်းပ

ပဲခူး ဩဂုတ် ၂၄

ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ လုပ်ငန်းညှိနှိုင်းအစည်းအဝေးကို ဩဂုတ် ၂၄ ရက် မွန်းလွဲပိုင်းက ပဲခူးတိုင်းဒေသကြီးအစိုးရအဖွဲ့ရုံး Video Conferencing ခန်းမ(၁)၌ ကျင်းပခဲ့သည်။

အစည်းအဝေးတွင် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ညီလန်းချိုက တရားမဝင်ကုန်သွယ်မှုတိုက်ဖျက်ရေး မူဝါဒနှင့် မဟာဗျူဟာများကို ပုံမှန်စောင့်ကြည့်အကဲဖြတ်ပြီး လိုအပ်ပါက ပြန်လည်သုံးသပ်ရန်၊ နယ်စပ်ဝင်ထွက်ဂိတ်များ၊ သိုလှောင်ရာနေရာများ၊ ကုန်သွယ်မှုလမ်းကြောင်းများနှင့် ဈေးကွက်များတွင် တရားမဝင်ကုန်စည် သိုလှောင်၊ သယ်ယူဖြန့်ဖြူးမှုများကို ထိရောက်စွာ ဖော်ထုတ်စစ်ဆေးရန် လမ်းညွှန်မှာကြားခဲ့သည်။

ထို့အပြင် ရှောင်ကွင်းလမ်းကြောင်းများမှ တရားမဝင်ကုန်စည်များ ဖြတ်သန်းသယ်ဆောင်မှု မရှိစေရေး လက်တွေ့ကျသည့် အစီအမံများ ချမှတ်ရန်နှင့် ဖမ်းဆီးရမိသည့် မော်တော်ယာဉ်နှင့် ပစ္စည်းများ အပ်နှံရာတွင် နှောင့်နှေးမှုကြောင့် ပျက်စီးဆုံးရှုံးမှု မဖြစ်ပေါ်စေရေး စနစ်တကျဆောင်ရွက်ရန် မှာကြားခဲ့သည်။

ယင်းနောက် အထူးအဖွဲ့ဝင်များက တရားမဝင်ကုန်သွယ်မှုတိုက်ဖျက်ရေး လက်ရှိဆောင်ရွက်နေမှုများကို ဆွေးနွေးတင်ပြခဲ့ကြပြီး ဝန်ကြီးက နိဂုံးချုပ်အမှာစကား ပြောကြားခဲ့ကြောင်း သိရသည်။
#Myanmagon

ပြည်မြို့နယ်အတွင်း စက်မှုလယ်ယာစနစ်သို့ ရာနှုန်းပြည့်ကူးပြောင်းနိုင်ရေး လိုအပ်ချက်များ ဖြည့်ဆည်းဆောင်ရွက်

ပြည် ဩဂုတ် ၂၄

ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းသည် တိုင်းဒေသကြီးအစိုးရအဖွဲ့ဝင် ဝန်ကြီးများနှင့် တာဝန်ရှိသူများနှင့်အတူ ဩဂုတ် ၂၃ ရက် နံနက်ပိုင်းက ပြည်မြို့နယ်အတွင်း စက်မှုလယ်ယာစနစ်သို့ ရာနှုန်းပြည့်ကူးပြောင်းနိုင်ရေးအတွက် လိုအပ်ချက်များ ဖြည့်ဆည်းပေးခြင်းနှင့် လယ်ယာစက်ကိရိယာထုတ်လုပ်ရေးလုပ်ငန်းများကို ကြည့်ရှုစစ်ဆေးခဲ့ကြောင်း သိရသည်။

ရှေးဦးစွာ ဝန်ကြီးချုပ်နှင့်အဖွဲ့သည် ပြည်မြို့နယ် ကြို့ရသာကျေးရွာရှိ ဦးအောင်ဇင်မင်း၏ “A One” လယ်ယာသုံးစက်ကိရိယာထုတ်လုပ်ရေးအလုပ်ရုံသို့ သွားရောက်၍ Mobile ပဲအမျိုးမျိုးခြွေလှေ့စက်နှင့် ပဲရိတ်သိမ်းစက်များ ထုတ်လုပ်နေမှုကို ကြည့်ရှုအားပေးခဲ့သည်။

ဝန်ကြီးချုပ်က တောင်သူများ တစ်ပိုင်တစ်နိုင် ဝယ်ယူအသုံးပြုနိုင်မည့် ဘက်စုံသုံးလယ်ယာစက်ကိရိယာများ ဆက်လက်ထုတ်လုပ်ရန်နှင့် အခြားပြည်နယ်နှင့် တိုင်းဒေသကြီးများမှ မှာယူထားသည့် လယ်ယာသုံးစက်ကိရိယာများကို အချိန်မီ ထုတ်လုပ်ပေးနိုင်ရေးအတွက် ကုန်ကြမ်းပစ္စည်းများ လွယ်ကူစွာရရှိရေး တာဝန်ရှိသူများနှင့် ပေါင်းစပ်ညှိနှိုင်းဖြည့်ဆည်းပေးခဲ့သည်။

ဆက်လက်၍ ပဲခူးတိုင်းဒေသကြီးအစိုးရအဖွဲ့၏ လမ်းညွှန်ချက်ဖြင့် စက်သုံးဆီလျှော့ချသုံးစွဲနိုင်ရေးအတွက် ပြည်မြို့ ရွှေဝါထွန်းလယ်ယာသုံးစက်ကိရိယာထုတ်လုပ်ရေးလုပ်ငန်းရှင် ဦးထွန်းထွန်းဦးက ဆိုလာအားသွင်းစနစ် အသုံးပြု၍ ထွန်ယက်စက် ထုတ်လုပ်စမ်းသပ်မောင်းနှင်နေမှုကို ကြည့်ရှုအားပေးခဲ့သည်။

ထွန်ယက်စက်ကို မြေအမျိုးအစားမရွေး အချိန်ကြာမြင့်စွာ အသုံးပြုနိုင်ရေးနှင့် စေ့ချစနစ် တစ်ပါတည်းထည့်သွင်းတီထွင်နိုင်ရေးအတွက် လိုအပ်ချက်များကို ပေါင်းစပ်ဖြည့်ဆည်းပေးခဲ့သည်။

ထို့နောက် ဝန်ကြီးချုပ်နှင့်အဖွဲ့သည် ပြည်မြို့နယ် မှော်ဇာကျေးရွာအုပ်စုရှိ စားဖိုဆောင်သီးနှံ တစ်အုပ်တစ်မစိုက်ခင်း ဧက ၃၀၀ စိုက်ပျိုးထားရှိမှုကို ကြည့်ရှုအားပေးခဲ့ပြီး ဒေသခံတောင်သူများနှင့် တွေ့ဆုံကာ ရာသီသီးနှံများ စိုက်ပျိုးပြီးစီးပါက ဆီထွက်ပဲပုပ် ဆက်လက်စိုက်ပျိုးနိုင်ရေး ပေါင်းစပ်ဆောင်ရွက်ပေးခဲ့သည်။

ယင်းနောက် ပြည်မြို့ နဝဒေးစက်မှုဇုန်ရှိ ဦးသိန်းထွန်းဝင်း၏ “သာလွန်ကောင်း” သဘာဝမြေဩဇာထုတ်လုပ်ရေးအလုပ်ရုံသို့ သွားရောက်ကြည့်ရှုအားပေးခဲ့သည်။

ထို့အပြင် ပြည်မြို့တွင်း လမ်းမိုင် ၂/၄ မှ ၂/၅ အတွင်း လမ်းတာဘောင်ပြိုကျပျက်စီးမှုကြောင့် ယာယီမြေထိန်းနံရံ ဆောင်ရွက်ထားရှိမှုကို သွားရောက်ကြည့်ရှုစစ်ဆေးခဲ့ပြီး ထပ်မံပြိုကျမှုမရှိစေရေးနှင့် ယာဉ်အန္တရာယ်၊ လမ်းအန္တရာယ်ကင်းရှင်းစေရေးအတွက် အန္တရာယ်ရှိလမ်းညွှန်အမှတ်အသားများနှင့် အသိပေးရောင်ပြန်များ ထားရှိရန်၊ လမ်းပိုင်းအား အမြန်ဆုံး ပြန်လည်ပြုပြင်နိုင်ရေး တာဝန်ရှိသူများအား လမ်းညွှန်မှာကြားခဲ့ကြောင်း သိရသည်။
#Myanmagon

နိုင်ငံတော်တည်ငြိမ်ရေးနှင့် ပြည်သူ့ဆက်သွယ်ရေး ကဏ္ဍမြှင့်တင်ရန် ပြည်ထောင်စုဝန်ကြီး ဦးထိန်လင်း “Media and Psychology” သင်တန်း ဖွင့်လှစ်


မြန်မာ့ဂုဏ် မေ ၂၃

ပြန်ကြားရေးဝန်ကြီးဌာန၊ မီဒီယာဖွံ့ဖြိုးတိုးတက်ရေးဦးစီးဌာန၏ ရက် (၁၀၀) စီမံကိန်းအတွင်း အကောင်အထည်ဖော်မည့် လုပ်ငန်းစဉ်တစ်ခုဖြစ်သည့် “Media and Psychology” (မီဒီယာနှင့် စိတ်ပညာ) သင်တန်း ဖွင့်ပွဲအခမ်းအနားကို မေလ (၁၈)ရက်နေ့
မွန်းလွဲ ၁ နာရီတွင် နေပြည်တော်ရှိ ပြန်ကြားရေးဝန်ကြီးဌာန စုပေါင်းခန်းမ၌ ကျင်းပခဲ့ရာ ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးထိန်လင်း တက်ရောက်၍ အဖွင့်အမှာစကား ပြောကြားခဲ့ကြောင်း သိရပါတယ်။

အဆိုပါ သင်တန်းဖွင့်ပွဲ အခမ်းအနားသို့ ပြန်ကြားရေးဝန်ကြီးဌာန ဒုတိယဝန်ကြီး၊ အမြဲတမ်းအတွင်းဝန်နှင့် ဌာနဆိုင်ရာ တာဝန်ရှိသူများ၊ သင်တန်းကထိကနှင့် သင်တန်းသား၊ သင်တန်းသူများ အစုံအလင် တက်ရောက်ခဲ့ကြပါတယ်။


ယခုဖွင့်လှစ်သည့် မီဒီယာနှင့် စိတ်ပညာသင်တန်းသည် နိုင်ငံတော် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေး လုပ်ငန်းစဉ်များတွင် မီဒီယာနည်းလမ်းများအသုံးပြုကာ ပြည်သူလူထုနှင့် ထိတွေ့သော ဆက်သွယ်ရေးကဏ္ဍ (Public Communication) ကို ပိုမိုတိုးမြှင့် တည်ဆောက်နိုင်ရန် ရည်ရွယ်ခြင်း ဖြစ်ပါတယ်။

အထူးသဖြင့် ပြည်သူလူထုထံ သတင်းအချက်အလက်များ တင်ဆက်ရာတွင် စိတ်ပညာ သဘောတရားများကို စနစ်တကျ ပေါင်းစပ်အသုံးပြုနိုင်ရေး၊ မီဒီယာကျင့်ဝတ်သိက္ခာ၊ တာဝန်ယူမှုနှင့် လူမှုတာဝန်ခံမှု (Social Accountability) တို့ကို အခြေခံသည့် ခိုင်မာသော မီဒီယာအကြောင်းအရာ (Media Content) များကို အရည်အသွေးပြည့်ဝစွာ ရေးသားထုတ်လုပ်နိုင်စေရန်အတွက် ရည်ရွယ်၍ အလေးထား ဖွင့်လှစ်ခြင်းဖြစ်ကြောင်း ထုတ်ပြန်ချက်
အရ သိရပါတယ်။


အဆိုပါ "Media and Psychology" သင်တန်းကို မီဒီယာဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဒေါက်တာသီတာတင်က အဓိက တာဝန်ယူ၍ (၅) ရက်ကြာ စနစ်တကျ စာတွေ့၊ မိန့်ခွန်းစစ်စစ်များနှင့် သင်ကြားပို့ချသွားတာဖြစ်ပါတယ်။

သင်တန်းသို့ ပြန်ကြားရေးဝန်ကြီးဌာနအောက်ရှိ ဌာနခွဲအသီးသီးမှ ဝန်ထမ်းများ၊ သတင်းနှင့် ပြန်ကြားရေးလုပ်ငန်းများနှင့် တိုက်ရိုက်သက်ဆိုင်သည့် အစိုးရဝန်ကြီးဌာနများမှ ဝန်ထမ်းများနှင့်အတူ ပုဂ္ဂလိက မီဒီယာလုပ်ငန်းများမှ စိတ်ပါဝင်စားသူများပါ တက်တက်ကြွကြွ တက်ရောက်ခဲ့တယ်လို့သိရပါတယ်။
#Myanmagon

ပြည်ထောင်စုဝန်ကြီး ဦးမောင်မြင့် ပြည်မြို့ သရေခေတ္တရာမြို့ဟောင်းအတွင်းရှိ ရှေးဟောင်းယဉ်ကျေးမှု အမွေအနှစ်များနှင့် သရေခေတ္တရာပြတိုက်အတွင်း ခင်းကျင်းပြသထားရှိမှု ကြည့်ရှုစစ်ဆေး

မြန်မာ့ဂုဏ် မေ ၂၃

ဟိုတယ်၊ ခရီးသွားလာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်သည် ယမန်နေ့တွင် ပဲခူးတိုင်းဒေသကြီး ပြည်မြို့ရှိ ကမ္ဘာ့အမွေအနှစ်စာရင်းဝင်ဒေသ သရေခေတ္တရာမြို့ဟောင်းအတွင်းရှိ ငလျင်ဒဏ်ကြောင့် ထိခိုက်ခဲ့သော ဘောဘောကြီးစေတီတော် ပြန်လည်ပြုပြင်ထိန်းသိမ်းမှုလုပ်ငန်းများ ဆောင်ရွက်နေမှု၊ ပျူခေတ်သင်္ဂြိုဟ်မြှုပ်နှံခဲ့သည့် အထောက်အထားများရှိသည့် အရိုးအိုးကုန်း (တူးဖော်မှုကုန်းအမှတ်-၅၃) နှင့် ငလျင်ဒဏ်ကြောင့် ထိခိုက်ခဲ့သော လေးမျက်နှာဂူဘုရား ပြန်လည်ပြုပြင်ထိန်းသိမ်းထားရှိမှုများကို လှည့်လည်ကြည့်ရှုစစ်ဆေးပါတယ်။

ထို့နောက် ရှေးဟောင်းသုတေသနနည်းပညာသင်တန်းကျောင်း (ပြည်) ၌ တာဝန်ရှိသူများနှင့် တွေ့ဆုံပြီး ယဉ်ကျေးမှုအမွေအနှစ်များကို ရှာဖွေ၊ ဖော်ထုတ်၊ ကာကွယ်ထိန်းသိမ်းစောင့်ရှောက်ခြင်းနှင့် ပတ်သက်၍ ပိုမိုကျယ်ပြန့်စွာ သိရှိနိုင်စေရန်၊ ပြည်သူလူထုအား အသိပညာပေးဟောပြောခြင်းနှင့် စာသင်ကျောင်းများတွင် အသိပညာပေး Educated ပြုလုပ်၍ အသိပညာဗဟုသုတများ တိုးတက်အောင်ဆောင်ရွက်စေလိုကြောင်း မှာကြားကာ ရှေးဟောင်းပစ္စည်းများအား သိပ္ပံနည်းကျသက်တမ်းတွက်ချက်သည့် Thermoluminescence Dating ဓာတ်ခွဲခန်းကို ကြည့်ရှုစစ်ဆေးပါတယ်။

ယင်းနောက် ပြည်မြို့ အလင်္ကာဟိုတယ်၌ ဌာနဆိုင်ရာများ၊ ဟိုတယ်လုပ်ငန်းရှင်များအသင်း၊ သရေခေတ္တရာဇုန်မှ တာဝန်ရှိသူများ၊ ဟိုတယ်နှင့် တည်းခိုခန်းလုပ်ငန်းရှင်များနှင့် တွေ့ဆုံပြီး ပြည်ဒေသသည် ပြည်ပခရီးသွားဧည့်သည်များ စိတ်ဝင်စားသည့် ဒေသတစ်ခုဖြစ်သည့်အပြင် ယဉ်ကျေးမှုကို အခြေခံသော ခရီးစဉ်ဒေသများစွာရှိသဖြင့် ယဉ်ကျေးမှုနှင့် ခရီးသွားလုပ်ငန်းဖွံ့ဖြိုးတိုးတက်ရေးအတွက် Media များတွင် ကြော်ငြာ၍ ခရီးသွားလုပ်ငန်းဖွံ့ဖြိုးတိုးတက်ရေးကို ဆောင်ရွက်သွားရန်နှင့် ယဉ်ကျေးမှုနှင့် ခရီးသွားလုပ်ငန်းပူးပေါင်း၍ ဝိုင်းဝန်းကြိုးစားဆောင်ရွက်ရန် မှာကြားခဲ့ကြောင်း သိရပါတယ်။
#Myanmagon