កម្ពុជាថ្មី International

🚨ចិន និងសារព័ត៌មានម៉ាឡេស៊ី បកស្បែកមុខថៃ ជាកន្លែងពោរពេញដោយ Scam ថែមទាំងជាស្ពានចម្លង នៃបណ្តាញជួញដូរមនុស្ស

ទោះខំលាងខ្លួន ហើយដើរបង្វែររឿងចោទប្រទេសដទៃយ៉ាងណា ក៏ថៃ ត្រូវបានគេបកស្បែកមុខថាជាជម្រក Scam ថែមទាំងជាមជ្ឈមណ្ឌលឆ្លងកាត់ និងស្ពានចម្លងសម្រាប់ឧក្រិដ្ឋជនបរទេស ក៏ដូចជាបណ្តាញជួញដូរមនុស្ស និងគ្រឿងញៀនផងដែរ។

ជាក់ស្តែងនាពេលថ្មីៗនេះ មានទាំងចិន និងម៉ាឡេស៊ី ដែលបានលាតត្រដាងអំពីសារជាតិពិតរបស់ថៃ ដោយសារព័ត៌មាន The Vibes របស់ម៉ាឡេស៊ី បានចេញផ្សាយអត្ថបទមួយ ដាក់ចំណងជើងថា «ការកើនឡើង នៃការគំរាមកំហែងករណីចាប់ពង្រត់ ពាក់ព័ន្ធអំពើឆបោក បានផ្លាស់ប្តូក្តីព្រួយបារម្ភលើសុវត្ថិភាព នៅក្នុងតំបន់អាស៊ីអាគ្នេយ៍»។

នៅក្នុងអត្ថបទដ៏វែងអន្លាយនោះ The Vibes បានលាតត្រដាងគ្មានសល់ថា ថៃនៅតែជាផ្លូវឆ្លងកាត់សំខាន់ ដោយសារហេដ្ឋារចនាសម្ព័ន្ធងាយស្រួលធ្វើដំណើរ និងព្រំដែនមានចន្លោះប្រហោង។

ជនរងគ្រោះ បានក្លាយជាគោលដៅនៅតាមតំបន់ប្រជុំជនធំៗ (ដូចជាទីក្រុងបាងកក) រួចត្រូវបានចាប់ពង្រត់ លួចលាក់ដឹកជញ្ជូនឆ្លងដែន ជាពិសេសចូលទៅមីយ៉ាន់ម៉ា និងបង្ខំឱ្យធ្វើការនៅក្នុងទីតាំង Scam ក្រោមការគៀបសង្កត់យ៉ាងខ្លាំងទាំងផ្លូវកាយ និងផ្លូវចិត្ត។

អត្ថបទនេះ ចេញផ្សាយស្របពេល ស្ថានទូតចិន ចេញការព្រមានថ្មី ដល់ពលរដ្ឋខ្លួន ឱ្យប្រយ័ត្នពេលធ្វើដំណើរទៅប្រទេសថៃ ជាពិសេសតារាល្បីៗ ដូចជាអ្នកសិល្បៈ និង Influencer ព្រោះតែហានិភ័យខ្ពស់ នៃការចាប់ជំរិត និងការឆបោកតាមអនឡាញ (SCAM) ព្រមទាំងករណីឆក់ប្លន់ដ៏ហិង្សាបែបនេះ។

ក្នុងសេចក្តីប្រកាសនោះ ស្ថានទូតចិន ប្រចាំទីក្រុងបាងកក ព្រមានថា ប្រជាពលរដ្ឋខ្លួន ដែលរៀបចំផែនការទៅលេងថៃ ត្រូវធ្វើដំណើរដោយប្រុងប្រយ័ត្ន និងយកចិត្តទុកដាក់បំផុត ជាពិសេសលើសុវត្ថិភាពការធ្វើដំណើរ បន្ទាប់ពីមានករណីចាប់ជំរិតជារឿយៗ ដែលកំណត់មុខសញ្ញាចំៗ លើជនជាតិចិន។

ក្នុងនោះ ស្ថានទូតព្រមានថា៖ «អ្នកដំណើរទាំងឡាយ ត្រូវយកចិត្តទុកដាក់ លើមធ្យោបាយធ្វើដំណើរដែលរៀបចំដោយអ្នកដទៃ ហើយត្រូវរៀបចំកាលវិភាគធ្វើដំណើរ ដោយជ្រើសរើសសេវាកម្មដឹកជញ្ជូនដែលមានអាជ្ញាប័ណ្ណ និងក្រុមហ៊ុនប្រតិបត្តិការស្របច្បាប់ ព្រមទាំងប្រុងប្រយ័ត្ន មិនត្រូវជិះយានយន្តរបស់អ្នកស្គាល់គ្នា ឬជនប្លែកមុខ ដែលធានាថា មិនគិតថ្លៃឡើយ»។

ការព្រមាននេះកើតឡើង ក្រោយពេល មានសេចក្តីរាយការណ៍ថា បុរសជាជនជាតិថៃ អាយុ ៣០ឆ្នាំម្នាក់ ដែលត្រូវចាប់ខ្លួនកាលពីថ្ងៃទី ១០ខែតុលា នៅខេត្ត Tak តាមបណ្តោយព្រំដែនមីយ៉ាន់ម៉ា គឺជាប់សង្ស័យ ជាផ្នែកនៃបណ្តាញជួញដូរមនុស្ស ដែលបានល្បួងជនជាតិចិន ៣នាក់ ឱ្យទៅថៃ ក្រោមល្បិចផ្តល់ការងារ ប៉ុន្តែគ្រប់យ៉ាងសុទ្ធជាការបោកប្រាស់ រួចដឹកពួកគេទៅកាន់តំបន់ព្រំដែន ទៅវិញ។

មិនត្រឹមប៉ុណ្ណឹង កាលពីដើមខែនេះ អ្នកថតរូបជនជាតិចិនអាយុ ៣៤ ឆ្នាំម្នាក់ ក៏បាត់ខ្លួនផងដែរ បន្ទាប់ពីបានធ្វើដំណើរមកកាន់ទីក្រុងបាងកក ដែលក្រោយមកស៊ើបដឹងថា នោះជាករណីចាប់ជំរិតទារប្រាក់។

រឿងនេះទៀតសោត កើតឡើងទន្ទឹមគ្នា នឹងការចេញរបាយការណ៍ចុងក្រោយ ពីមជ្ឈមណ្ឌលប្រឆាំងបទល្មើសបោកប្រាស់តាមប្រព័ន្ធអនឡាញ (ACSC) នៃអគ្គស្នងការដ្ឋាននគរបាលជាតិថៃ ដែលបង្ហាញថា ត្រឹមមួយសប្តាហ៍ប៉ុណ្ណោះ ពោលគឺចាប់ពីថ្ងៃទី ១១ ដល់ ១៧ ខែតុលា ឆ្នាំ២០២៦ ប៉ូលិសបានទទួលបណ្តឹងអំពី ករណី Scam សរុប ៦ ០៣៣ ករណី ជាមួយនឹងទំហំទឹកប្រាក់បោកប្រាស់បាន ២៧៣ លានបាត។

តាមទិន្នន័យ បទល្មើស Scam ទាំងនេះ គឺពាក់ព័ន្ធនឹងការទិញលក់ទំនិញ និងសេវាកម្មអនឡាញ ជាពិសេសតាមបណ្តាញ Facebook, Line និង TikTok ដែលសុទ្ធសឹង ជាប្រភពនៃហានិភ័យធ្ងន់ធ្ងរ។

តាមការរកឃើញ! ក្នុងរយៈពេលមួយសប្តាហ៍មកនេះ ពលរដ្ឋថៃ ដែលរងគ្រោះដោយការឆបោកតាមអនឡាញ គឺមាន ចាញ់បោកតាម Facebook ៧៤.៣%, Line ៦.៥% និង TikTok ៦.១%។ ក្នុងនោះដែរ ការចាញ់បោកលើការទិញសំលៀកបំពាក់ មានរហូតដល់ទៅ ៥៤៩ករណី បន្ទាប់មក ពាក់ព័ន្ធយានយន្ត ៥២៥ករណី និង ទំនិញនិងសេវាកម្មពាក់ព័ន្ធទេសចរណ៍ ៥០៥ករណី។

សម្រាប់ខេត្ត-ក្រុង ដែលមានចំនួនករណី រាយការណ៍ច្រើនជាងគេក្នុងសប្តាហ៍នេះ គឺរាជធានីបាងកក ឈរលេខ១ ដោយមាន ១២៨ករណី បោកបានប្រាក់ ១១.៤ លានបាត, ទី២ គឺខេត្ត Samut Prakan មាន ៣៧ករណី អស់ប្រាក់ ២៤.៤ លានបាត និងទី៣ គឺខេត្ត Pathum Thani មាន ២៩ករណី អស់ប្រាក់ ២.២លានបាត៕

ប្រភព៖ Vibes

🚨ហ្សេលេន​ស្គី​ អះ​អាង​ថា លោក ត្រាំ អាចនាំ​ ពូទីន​ ទៅ​តុ​ចរចា​យ៉ាង​​ងាយ ​បើ​ដាក់សម្ពាធ​រុស្ស៊ី​ ដូចអ៊ុយក្រែន

មេដឹកនាំ​អ៊ុយ​ក្រែន​ វ៉ូឡូ​ឌីមៀរ ហ្សេលេន​ស្គី​ ​ជឿជាក់​ថា ប្រមុខសេតវិមាន ដូណាល់ ត្រាំ មាន​ឥទ្ធិ​ពល​គ្រប់គ្រាន់​ ដើម្បី​នាំប្រធានាធិបតីរុស្ស៊ី វ៉្លាឌីមៀ​ ពូទីន ទៅ​កាន់​តុ​ចរចា ហើយ​ទីក្រុងវ៉ាស៊ីនតោន​ចាំបាច់​ ​ត្រូវ​​​តែ​ដាក់​សម្ពាធ និង​បញ្ចេញ​វោហោសាស្រ្ត​លើ​ទី​ក្រុងមូស្គូ ដូចខ្លួន​ធ្លាប់​អនុវត្ត​ ចំពោះទីក្រុងកៀវដែរ​​។ នេះបើយោង​តាមទី​ភ្នាក់​ងារ​​សារព័ត៌មាន Anadolu នៅថ្ងៃសុក្រ ទី២៣ ខែតុលា ឆ្នាំ២០២៦។

ក្នុង​កម្មវិធីផតខាស «The Diary of a CEO» អ្នកសម្រប​សម្រួល លោក Steven Bartlett បាន​សួរ​ទៅ​ លោក ហ្សេលេន​ស្គី ថា តើលោក​មើលឃើញ​ពីលទ្ធភាពជាក់ស្តែង​ណាមួយក្នុង​ការបញ្ចប់សង្គ្រាមរបស់រុស្ស៊ី​ ប្រឆាំងនឹងអ៊ុយក្រែនដែរ​ឬទេ?

លោក ហ្សេលេន​ស្គី បានឆ្លើយថា​៖ «​លោក ត្រាំ អាច​នាំ​ លោក ពូទីន ទៅកាន់តុចរចាបានយ៉ាង​ងាយស្រួល។ ព្រោះ របៀប​ដែល​គាត់និយាយ​អមកកាន់​ខ្ញុំ គាត់ក៏គួរតែ​និយាយទៅកាន់​លោក ពូទីន ក្នុង​លក្ខណៈ​ដូចគ្នាដែរ»។

មេដឹកនាំអ៊ុយ​ក្រែនរូបនេះ បានលើកឡើង​អំពី​វិធានការ​ដាក់ទណ្ឌកម្មរបស់​​សភាអាមេរិក​​ដែល​អនុម័តរួចហើយ ដោយ​បញ្ជាក់ថា លោក ត្រាំ មាន​ឧបករណ៍​សេដ្ឋកិច្ច​ដ៏មានឥទ្ធិពល​ក្នុងដៃ ប្រសិន​បើគាត់សម្រេចចិត្ត​ប្រើប្រាស់​វា ប្រឆាំង​នឹងរុស្ស៊ី។​

លោក ហ្សេលេនស្គី បានអះអាងថា៖ «គាត់[​លោក​ត្រាំ] អាចធ្វើវាបាន»។

ប្រធានាធិប​តី​អ៊ុយ​ក្រែន​ បានលើក​ឡើងថា ​ការស្ទាក់ស្ទើរ​របស់​ លោក ត្រាំ ក្នុងការដាក់ចេញនូវ​វិធាន​ការទាំង​នេះ អាច​បណ្តាលមកពីទំនាក់​ទំនង​ពិសេស​រវាងប្រធានាធិបតី​អាមេរិក និង​ លោក ពូទីន​​៕

ប្រភព៖ Anadolu

🚨ពូទីន៖ តាមពិតរុស្ស៊ី មិនធ្វើសង្គ្រាមជាមួយអ៊ុយក្រែនទេ តែអ៊ុយក្រែនខ្លួនឯង ជាអ្នកចង់មានសង្គ្រាម

ធ្មេចបើកៗ សង្គ្រាមរុស្ស៊ី-អ៊ុយក្រែន អូសបន្លាយពេលជិត ៥ឆ្នាំហើយ ខណៈផ្លូវឈានឆ្ពោះទៅរកសន្តិភាព ពោរពេញដោយបន្លា និងឧបសគ្គជាច្រើនទៀត។

យ៉ាងណា ថ្លែងកាលពីថ្ងៃព្រហស្បតិ៍ ទី២២ ខែតុលា ឆ្នាំ២០២៦ លោក វ្ល៉ាឌីមៀរ ពូទីន បានបញ្ជាក់ពីដើមចម ឈានដល់ការផ្ទុះអាវុធទ្រង់ទ្រាយធំនោះ ដោយប្រមុខវិមានក្រឹមឡាំងរូបនេះ និយាយយ៉ាងច្បាស់ថា តាមពិតទៅរុស្ស៊ី ក៏មិនចង់ធ្វើសង្គ្រាមជាមួយអ៊ុយក្រែនដែរ ប៉ុន្តែអ៊ុយក្រែនខ្លួនឯងទេ ដែលជ្រើសរើសយកសង្គ្រាម។

បើតាមសម្តីលោកពូទីន ដែលត្រូវបានដកស្រង់ដោយទូរទស្សន៍ RT, អ៊ុយក្រែន បានជ្រើសរើសដើរផ្លូវនេះ ក្នុងឆ្នាំ២០១៤ ដែលកាលនោះ ទីក្រុងកៀវ សម្រេចចិត្តធ្វើសង្គ្រាម ប្រឆាំងនឹងប្រជាជននៅតំបន់ Donbass ដែលបានជំទាស់រដ្ឋប្រហារ Maidan ហើយអ៊ុយក្រែន ក៏ច្រានចោលផងដែរ នូវរាល់កិច្ចខិតខំប្រឹងប្រែងមួយលើកជាពីរលើក របស់ទីក្រុងមូស្គូ ក្នុងការសម្របសម្រួលដើម្បីដោះស្រាយជម្លោះនោះ។

លោកពូទីន បន្តថា៖ «បើថ្នាក់ដឹកនាំអ៊ុយក្រែនបច្ចុប្បន្ន ចង់ធ្វើសង្គ្រាមទៅហើយនោះ សូមឱ្យពួកគេធ្វើសង្គ្រាមចុះ ប៉ុន្តែហេតុអ្វី ពួកគេបែរជាទៅពឹងផ្អែកលើអ្នកដទៃ ឱ្យចេញថ្លៃចំណាយជំនួស និងផ្គត់ផ្គង់អាវុធដល់ពួកគេទៅវិញ? ខ្ញុំគិតថា នោះទំនងជាផ្អែកលើការសន្យាជួយ កាលពីអតីតកាលហើយ»។

ជុំវិញរឿងបាត់ដី ពូទីន ប្រាប់ថា អ៊ុយក្រែន មិនគួរស្រែកថាបាត់ដីទេ ព្រោះ ទឹកដីទាំងនោះ មិនធ្លាប់ជារបស់អ៊ុយក្រែនឡើយ តាំងពីដើមមកម្ល៉េះ៕

ប្រភព៖ RT

🚨អាមេរិក ព្រមាន កាណាដា កុំឱ្យលូកដៃក្នុងនយោបាយខ្លួន ខណៈទីក្រុងអូតាវ៉ា ទាត់ចោលការចោទប្រកាន់

សហរដ្ឋអាមេរិកបានចោទប្រកាន់មន្ត្រីកាណាដា ថា ព្យាយាមលូកដៃ និងជ្រៀតជ្រែកចូលក្នុងការបោះឆ្នោតពាក់កណ្តាលអាណត្តិរបស់អាមេរិក ដែលនឹងប្រព្រឹត្តទៅនៅខែវិច្ឆិកា ខាងមុខនេះ។ នេះបើយោងតាមការចេញផ្សាយពីសារព័ត៌មាន Newsweek។

នៅក្នុងនោះផងដែរ ទីក្រុងវ៉ាស៊ីនតោន បានបង្ហាញភស្តុតាងសំខាន់ៗ រួមមានវិធានការពាណិជ្ជកម្មដែលកំណត់គោលដៅនយោបាយ យុទ្ធនាការផ្សព្វផ្សាយពាណិជ្ជកម្មប្រឆាំងនឹងលោក ​ដូណាល់ ត្រាំ និងការជួបប្រជុំគ្នារវាងមន្ត្រីកាណាដា ជាមួយអ្នកនយោបាយនៃគណបក្សប្រជាធិបតេយ្យអាមេរិក។

នៅក្នុងឯកសារអង្គហេតុមួយ ដែលបានចេញផ្សាយកាលពីថ្ងៃទីទី២១ ខែតុលា ស្ថានទូតអាមេរិកប្រចាំទីក្រុងអូតាវ៉ា បានចោទប្រកាន់រដ្ឋាភិបាលរបស់នាយករដ្ឋមន្ត្រីកាណាដា លោក Mark Carney ថា បាននិងកំពុងស្វែងរកឥទ្ធិពលលើនយោបាយអាមេរិកដោយចំហ។

ស្ថានទូតបានគូសបញ្ជាក់ចំៗលើរដ្ឋមន្ត្រីក្រសួងឧស្សាហកម្មកាណាដា លោកស្រី Melanie Joly ចំពោះការលើកឡើងរបស់លោកស្រី អំពីការកំណត់ពន្ធសងសឹកដោយចេតនាលើបណ្តារដ្ឋដែលលំអៀងទៅរកគាំទ្រគណបក្សសាធារណរដ្ឋ ដើម្បីដាក់សម្ពាធលើរដ្ឋបាលលោក ត្រាំ ជុំវិញគោលនយោបាយពាណិជ្ជកម្មភាពគាំពារនិយម។

ក្រៅពីនេះ ភាគីអាមេរិកក៏បានលើកឡើងពីសកម្មភាពគួរឱ្យសង្ស័យផ្សេងទៀត រួមមានការជួបប្រជុំរបស់លោកស្រី Joly ជាមួយមន្ត្រីគណបក្សប្រជាធិបតេយ្យនៅបូស្តុន និងឈីកាហ្គោ កាលពីខែកញ្ញា និងយុទ្ធនាការផ្ទាំងប៉ាណូប្រឆាំងពន្ធគយរបស់អភិបាលខេត្ត Ontario លោក Doug Ford ដែលបានប្រើប្រាស់រូបភាពអតីតប្រធានាធិបតី Ronald Reagan ដើម្បីរិះគន់គោលនយោបាយពាណិជ្ជកម្មអាមេរិក។

មិនតែប៉ុណ្ណោះ ឯកសារនេះក៏បានកត់សម្គាល់ពីការលេចមុខរបស់អគ្គកុងស៊ុលកាណាដា លោកស្រី Bernadette Jordan ក្នុងកិច្ចពិភាក្សាតុមូលស្តីពីពាណិជ្ជកម្មនៅរដ្ឋ Vermont ជាមួយសមាជិកសភាបក្សប្រជាធិបតេយ្យ ត្រឹមតែ៣សប្តាហ៍មុនការបោះឆ្នោត និងករណីពលរដ្ឋកាណាដាចំនួន ១១ នាក់ ដែលត្រូវបានចោទប្រកាន់ឬផ្តន្ទាទោសក្នុងឆ្នាំ២០២៦ ពីបទបោះឆ្នោតដោយខុសច្បាប់នៅក្នុងការបោះឆ្នោតអាមេរិកនាពេលកន្លងមក។

លោក Pete Hoekstra ឯកអគ្គរដ្ឋទូតអាមេរិកប្រចាំកាណាដា បានព្រមានថា ទីក្រុងវ៉ាស៊ីនតោនកំពុងតាមដានយ៉ាងដិតដល់ ហើយបើសកម្មភាពទាំងនោះក្លាយជាការជ្រៀតជ្រែកការបោះឆ្នោត អាមេរិកនឹងឆ្លើយតបវិញជាមិនខាន។

ទោះជាយ៉ាងណា ភាគីទីក្រុងអូតាវ៉ា (Ottawa) បានទាត់ចោលការចោទប្រកាន់ទាំងនេះ។ នាយករដ្ឋមន្ត្រី លោក Carney បានពន្យល់ថា វិធានការរបស់កាណាដា គឺធ្វើឡើងដើម្បីការពារកម្មករ និងអាជីវកម្មរបស់ខ្លួនពីពន្ធគយរបស់អាមេរិកតែប៉ុណ្ណោះ ខណៈលោកស្រី Joly បានការពារការជួបប្រជុំរបស់លោកស្រីថាជាកិច្ចការការទូតធម្មតា ដែលត្រូវធ្វើឡើងជាមួយទាំងគណបក្សសាធារណរដ្ឋ និងគណបក្សប្រជាធិបតេយ្យ៕

ប្រភព៖ Newsweek

🚨និស្សិត សហជីព និងចលនា «អាវលឿង» គ្រោងធ្វើបាតុកម្មទ្រង់ទ្រាយធំនៅទូទាំងប្រទេសបារាំង

មនុស្សរាប់ម៉ឺននាក់ត្រូវបានរំពឹងថា នឹងចេញធ្វើបាតុកម្មនៅទូទាំងប្រទេសបារាំងនៅថ្ងៃសៅរ៍ ទី១៧ ខែតុលា ខណៈនិស្សិត សមាជិកសហជីព និងសកម្មជនដែលនៅសេសសល់ពីចលនា «អាវកាក់លឿង» (Yellow Vests) រួមកម្លាំងគ្នាដើម្បីតវ៉ាប្រឆាំងនឹងការឡើងថ្លៃទំនិញ និងការធ្លាក់ចុះនៃប្រព័ន្ធសង្គមរបស់ប្រទេស។ នេះបើយោងតាមទីភ្នាក់ងារសារព័ត៌មាន Reuters។

រលកបាតុកម្មដំបូងបានចាប់ផ្តើមកាលពីខែមុន នៅតាមវិទ្យាល័យក្នុងតំបន់ជាយក្រុងប៉ារីសភាគខាងជើង ដែលមានប្រជាជនចំណូលទាប។ ការខឹងសម្បាររបស់សិស្សចំពោះការអវត្តមានរបស់គ្រូបង្រៀន និងស្ថានភាពសាលារៀនដែលទ្រុឌទ្រោម បានរីករាលដាលក្លាយជាចលនាតវ៉ាទូទាំងប្រទេស ប្រឆាំងនឹងវិសមភាពសង្គម ការចំណាយសាធារណៈមិនគ្រប់គ្រាន់ និងការធ្លាក់ចុះនៃគុណភាពសេវាសាធារណៈ។

បាតុកម្មនេះកើតឡើងនៅពេលប្រទេសបារាំងកំពុងប្រឈមនឹងបញ្ហានយោបាយ និងសេដ្ឋកិច្ច ខណៈអាណត្តិប្រធានាធិបតីលោក Emmanuel Macron កំពុងឈានដល់ដំណាក់កាលចុងក្រោយ។ ប្រទេសនេះកំពុងប្រឈមនឹងការបែកបាក់ផ្នែកនយោបាយ និងការបែងចែកមតិសាធារណជនកាន់តែខ្លាំង។

ទន្ទឹមនឹងនេះ វិនិយោគិនកំពុងលក់មូលបត្របំណុលរបស់បារាំង ដែលធ្វើឱ្យថ្លៃខ្ចីប្រាក់របស់ប្រទេសកើនឡើងដល់កម្រិតខ្ពស់បំផុតក្នុងរយៈពេលជាង ២០ ឆ្នាំ។ បញ្ហានេះក៏បានបង្ហាញពីការលំបាកយូរអង្វែងរបស់បារាំងក្នុងការគ្រប់គ្រងហិរញ្ញវត្ថុសាធារណៈផងដែរ។

នាយករដ្ឋមន្ត្រីបារាំង លោក Sébastien Lecornu បានព្រមានកាលពីថ្ងៃព្រហស្បតិ៍ ទី១៥ ខែតុលា ថា អាជ្ញាធរបារម្ភថា បាតុកម្មចុងសប្តាហ៍នេះអាចប្រែក្លាយជាភាពចលាចល និងអំពើហិង្សា។ រដ្ឋាភិបាលបានចោទប្រកាន់គណបក្សឆ្វេងនិយមជ្រុល France Unbowed (LFI) ថាបានជំរុញឱ្យបាតុកម្មកាន់តែតានតឹង ប៉ុន្តែគណបក្សនេះបានបដិសេធការចោទប្រកាន់។

លោក Lecornu បាននិយាយថា ចាប់តាំងពីបាតុកម្មចាប់ផ្តើមមក មន្ត្រីប៉ូលិសជាង ៩០០ នាក់បានរងរបួស ដែលលោកចាត់ទុកថាជាកម្រិតហិង្សាមួយក្នុងចំណោមកម្រិតធ្ងន់ធ្ងរបំផុតក្នុងរយៈពេលជាច្រើនទសវត្សរ៍៕

ប្រភព៖ Reuters

🚨រុស្ស៊ី​ បន្តវាយលុក​ បង្កើត​តំបន់សន្តិសុខ ដោយព្រមានថា មិនយក​បញ្ហានេះ​ មកចរចាជាមួយអ៊ុយក្រែនដាច់​ខាត

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសថា ទីក្រុងមូស្គូនឹងបន្តធ្វើការវាយប្រហារទ្រង់ទ្រាយធំទៅលើទីតាំងការពារ និងមជ្ឈមណ្ឌលភស្តុភាររបស់អ៊ុយក្រែន ហើយនឹងមិនដាក់បញ្ចូលការបង្កើតតំបន់សន្តិសុខនៅតាមបណ្តោយព្រំដែន ទៅក្នុងការចរចាសន្តិភាពនោះទេ។

យោងតាមទីភ្នាក់ងារសារព័ត៌មាន TASS កាលពីថ្ងៃទី ១៧ ខែតុលា អំឡុងពេលចុះទស្សនកិច្ចនៅទីបញ្ជាការរងរបស់កងកម្លាំងរុស្ស៊ី កំពុងចូលរួមក្នុងប្រតិបត្តិការយោធាក្នុងប្រទេសអ៊ុយក្រែន លោក ពូទីន ថ្លែងអំពីគោលដៅយោធា ស្ថានភាពនៅលើសមរភូមិ និងភារកិច្ចការពារតំបន់ព្រំដែនរបស់រុស្ស៊ី។

មេដឹកនាំរុស្ស៊ីរូបនេះសង្កត់ធ្ងន់ថា កងទ័ពរបស់ប្រទេសនឹងបន្តអនុវត្តតាមគោលដៅដែលបានកំណត់ រួមមានការពង្រីកការគ្រប់គ្រងនៅក្នុងតំបន់ Donetsk ការបន្តប្រតិបត្តិការវាយលុកប្រឆាំងនឹងទីតាំងយោធារបស់អ៊ុយក្រែន និងការបង្កើតតំបន់សន្តិសុខមួយ ដើម្បីការពារទឹកដីរបស់រុស្ស៊ី។

ប្រធានាធិបតី ពូទីន បានថ្លែងថា ប្រទេសរុស្ស៊ីនឹងមិនដាក់បញ្ហានៃការធានាសុវត្ថិភាពនៅតាមតំបន់ព្រំដែនរបស់ខ្លួន ទៅជាចំណុចសម្រាប់ការចរចានៅក្នុងកិច្ចពិភាក្សាសន្តិភាពណាមួយជាមួយអ៊ុយក្រែននោះទេ។

យោងតាមលោក ពូទីន បន្ទាប់ពីកងកម្លាំងអ៊ុយក្រែនបានចូលទៅក្នុងខេត្ត Kursk របស់រុស្ស៊ី ទីក្រុងមូស្គូបានដាក់បញ្ជាឱ្យកងទ័ពរបស់ខ្លួន មិនត្រឹមតែរុញច្រានកងកម្លាំងសត្រូវចេញពីទឹកដីនោះប៉ុណ្ណោះទេ ប៉ុន្តែថែមទាំងបង្កើតតំបន់សុវត្ថិភាពមួយ ដើម្បីទប់ស្កាត់ការវាយប្រហារស្រដៀងគ្នានេះ នាពេលអនាគតទៀតផង។

ប្រធានាធិបតីរុស្ស៊ីរូបនេះបញ្ជាក់ថា៖ «ភារកិច្ចរបស់យើង គឺធានាសុវត្ថិភាពដាច់ខាតសម្រាប់តំបន់ព្រំដែនរបស់រុស្ស៊ីនាពេលអនាគត ហើយយើងនឹងមិនលើកយកបញ្ហានេះមកពិភាក្សានៅក្នុងការចរចាសន្តិភាពណាមួយជាមួយអ៊ុយក្រែននោះទេ»។

លោក ពូទីន លើកឡើងថា ការបង្កើតតំបន់សុវត្ថិភាពនេះ កំពុងដំណើរការទៅដោយជោគជ័យ ហើយលោកណែនាំដល់មេបញ្ជាការយោធាឱ្យបន្តអនុវត្តភារកិច្ចនេះស្របតាមគោលដៅនៃប្រតិបត្តិការយោធា កំណត់ដោយទីក្រុងមូស្គូ៕

ប្រភព៖ TASS

🚨បាតុករ ដាក់ការទាមទារ ៦ចំណុច ក្នុងបាតុកម្មដ៏ខ្លាំងក្លាប្រឆាំង IMF-World Bank នៅ បាងកក 

បាតុកម្មប្រឆាំងកិច្ចប្រជុំ មូលនិធិរូបិយវត្ថុអន្តរជាតិ (IMF) និងធនាគារពិភពលោក (World Bank) ក្នុងប្រទេសថៃ នៅតែធ្ងន់ធ្ងរ ដល់ថ្នាក់កងកម្លាំង ដាក់ទូកុងតឺន័រ និងរបាំងដែក ដើម្បីរារាំងក្រុមអ្នកតវ៉ា រុញឱ្យសភាពការណ៍វឹកវរខ្លាំង។

ទោះមានវិធានការតឹងរ៉ឹងបែបនេះក្តី ក៏មិនអាចបង្អាក់ដំណើរការបានដែរ ដោយក្រុមបាតុកររាប់រយនាក់ ​នាំគ្នាសម្រុកតវ៉ា ថែមទាំងដាក់ចេញនូវការទាមទារចំនួន ៦ចំណុច ទៅជំនួបកំពូលនេះ ទៀតផង។

តាមការផ្សាយរបស់ Khaosod កាលពីថ្ងៃសុក្រ ទី១៦ ខែតុលា ឆ្នាំ២០២៦, ក្នុងអំឡុងបាតុកម្មនោះ បណ្តាញប្រជាជន ប្រឆាំងធនាគារពិភពលោក និង IMF បានអានសេចក្តីថ្លែងការណ៍មួយ ដោយគូសបញ្ជាក់ពីការទាមទាររបស់ «អង្គការសភាជនក្រីក្រ» ដែលធ្វើឡើងចំទិវាស្បៀងអាហារពិភពលោក។

សេចក្តីថ្លែងការណ៍នោះ បានរិះគន់អ្វីដែលក្រុមនេះពិពណ៌នាថាជា តួនាទីបង្កផលប៉ះពាល់របស់ធនាគារពិភពលោក និង IMF ក្នុងការបំផ្លាញអធិបតេយ្យភាពស្បៀងអាហារ និងការងើបឡើងវិញនៃរចនាសម្ព័ន្ធអាណានិគមនិយមបែបថ្មី។

🚨ការទាមទារទាំង ៦ចំណុចនោះ រួមមាន៖

1.លុបបំណុល សម្រាប់ប្រទេសដែលមានចំណូលទាប និងមធ្យម ដែលកំពុងប្រឈមមុខនឹងវិបត្តិបំណុល។

2.អនុញ្ញាតឱ្យមានការពិនិត្យពិច័យ ជាសាធារណៈលើបំណុលបរទេស ដែលរដ្ឋាភិបាលនានា ជំពាក់។

3.បញ្ចប់ការផ្តល់ប្រាក់ឧបត្ថម្ភធន ដល់ក្រុមហ៊ុនសាជីវកម្មធំៗ ហើយបង្វែរថវិកាសាធារណៈទៅជួយគាំទ្រកសិកម្មបែបអេកូឡូស៊ី ព្រមទាំងបង្វែរការវិនិយោគលើវិស័យស្បៀងអាហារ កសិកម្ម និងអាកាសធាតុ ឱ្យផុតពីខ្សែច្រវាក់ផ្គត់ផ្គង់ ដែលគ្របដណ្តប់ដោយក្រុមហ៊ុនសាជីវកម្ម វិញ។

4.បង្កើនចំណូលរដ្ឋ តាមរយៈប្រព័ន្ធពន្ធដារជឿនលឿន រួមទាំងការប្រមូលពន្ធសមរម្យ លើប្រាក់ចំណេញរបស់ក្រុមហ៊ុនសាជីវកម្ម និងការប្រមូលពន្ធលើទ្រព្យសម្បត្តិរបស់អ្នកមានមហាសេដ្ឋី។

5.ធ្វើឱ្យធនាគារកណ្តាល មានលក្ខណៈប្រជាធិបតេយ្យ តម្លាភាព និងគណនេយ្យភាពចំពោះសាធារណជន ដោយធានាថា ស្ថាប័នទាំងនេះការពារផលប្រយោជន៍ របស់កម្មករនិយោជិត ជាជាងការពារផលប្រយោជន៍ របស់ក្រុមហ៊ុនអាជីវកម្មធំៗ។

6.គិតប្រជាជន និងភពផែនដី ជាធំ ក្នុងការរៀបចំគោលនយោបាយសេដ្ឋកិច្ច។

សូមជម្រាបជាថ្មី ការតវ៉ានៅថៃ គឺជាផ្នែកមួយនៃយុទ្ធនាការសកល របស់បណ្តាញចលនាកសិករអន្តរជាតិ La Via Campesina ក្នុងប្រទេសជាង ៦០ ដើម្បីទាមទារលក្ខខណ្ឌ ៦ ចំណុចពីស្ថាប័នហិរញ្ញវត្ថុពិភពលោក៕

ប្រភព៖ Khaosod

🚨អនុទីន ចាប់ផ្តើមរងសម្ពាធខ្លាំងឡើងៗ ពីក្រុមជ្រុលនិយម ថៃ ដឹកនាំដោយ ស៊ិនធិ

អនុទីន កំពុងរងសម្ពាធខ្លាំង ខណៈរលកនៃការប្រឆាំង កំពុងពុះកញ្ជ្រោលក្នុងប្រទេសថៃ ជាពិសេសថ្មីៗនេះ អតីតមេដឹកនាំក្រុមអាវលឿង បានចេញមុខដោយផ្ទាល់ បរិហានាយករដ្ឋមន្ត្រីថៃ តែម្តង។

ចំពោះរឿងហេតុចុងក្រោយបំផុតនេះ ស៊ិនធិ លឹមថងគុល បានប្រកាសបើកយុទ្ធនាការ «ដណ្តើមយក ​ប្រទេសថៃរបស់យើងមកវិញ» ដោយចោទប្រកាន់ថា រដ្ឋាភិបាលទីក្រុងបាងកក ក្រោមការដឹកនាំរបស់ ​អនុទីន បានបណ្តែតបណ្តោយឲ្យ មានបណ្តាញអាជីវកម្មខុសច្បាប់ពីបរទេស ជាពិសេសសំដៅលើអ៊ីស្រាអែល តែម្តង ឲ្យមកទិញដីធ្លី និងធ្វើអាជីវកម្ម ក្នុងប្រទេសថៃ ដោយប្រើឈ្មោះជនជាតិថៃ ដើម្បីបាំងមុខ។

តាមសម្តីរបស់ ស៊ិនធិ, ជនជាតិអ៊ីស្រាអែល ក្នុងចំណោមជនបរទេសផ្សេងទៀត កំពុងបើកអាជីវកម្មកខ្វក់ ដោយប្រើប្រាស់ជនជាតិថៃ ជារនាំងពាំងមុខ ប៉ុន្តែរដ្ឋាភិបាលអនុទីន អសកម្មខ្លាំងណាស់ ក្នុងការចាត់វិធានការ ឬដោះស្រាយបញ្ហាទាំងនោះ។ ដូច្នេះហើយ លោកក៏ចាប់ផ្តើមយុទ្ធនាការនេះ ដោយនឹងដើរក្បួនទៅតវ៉ានៅស្ថានទូតអ៊ីស្រាអែល ហើយដាក់ញត្តិនៅទីនោះ នាថ្ងៃទី១០ ខាងមុខតែម្តង។ លោកប្រកាសថា៖ «បើប្រយុទ្ធដើម្បីដណ្តើមយកប្រទេសថៃ ត្រឡប់មកវិញ ខ្ញុំសុខចិត្តស្លាប់»។

មិនត្រឹមប៉ុណ្ណឹង ក៏មានការរិះគន់ផងដែរ លើដោះស្រាយរបស់អនុទីន ចំពោះការសង្គ្រោះទឹកជំនន់ ភាពមិនប្រក្រតីក្នុងការប្រឡងចូលបម្រើការងាររដ្ឋ និងវិវាទដីធ្លីនៅតំបន់ Khao Kradong។

ក្រៅពីការដើរក្បួនទៅស្ថានទូតអ៊ីស្រាអែល នៅថ្ងៃទី១០ហើយនោះ, ស៊ិនធិ ក៏ព្រមាន ធ្វើបាតុកម្មតាមដងផ្លូវទ្រង់ទ្រាយធំផងដែរ ប្រសិនបើនៅថ្ងៃទី១៤ គណៈកម្មាធិការជាតិរៀបចំការបោះឆ្នោតថៃ សម្រេចទម្លាក់ចោល ការចោទប្រកាន់លើករណីស៊ុមគ្រលុំគ្នា ក្នុងការបោះឆ្នោត ជ្រើសរើសសមាជិកព្រឹទ្ធសភា ដែលពាក់ព័ន្ធនឹងអ្នកនយោបាយធំៗ។

ទន្ទឹុមនោះ បើតាមការផ្សាយរបស់ Thai Newsroom កាលពីថ្ងៃចន្ទ ទី៧ ខែកញ្ញា ឆ្នាំ២០២៦ គិតត្រឹមពេលនេះ មានក្រុមរហូតដល់ទៅ ៥ហើយ ដែលបង្ហាញបំណងចូលរួមចលនារបស់ ស៊ិនធិ។

យ៉ាងណា ជុំវិញរឿងនេះ ក៏មានប្រតិកម្មពីរដ្ឋាភិបាលថៃដែរ ដោយរដ្ឋមន្ត្រីក្រសួងធនធានធម្មជាតិ និងបរិស្ថាន Suchart Chomklin បានរិះគន់ចំៗទៅ ស៊ិនធិ ហើយព្រមានថា ការធ្វើបាតុកម្មតាមដងផ្លូវជាថ្មី អាចធ្វើឱ្យប្រទេសជាតិ ដើរថយក្រោយ ២០ ឆ្នាំ។

ជាពិសេស លោកព្រមានថា ទង្វើបែបនេះ ពិតជាមានហានិភ័យខ្លាំងណាស់ ដែលវានឹងធ្វើខូចដល់ទំនុកចិត្តរបស់វិនិយោគិនបរទេស។

ទោះបីជាយ៉ាងណាក៏ដោយ ជុំវិញរឿងនេះ អនុទីន មិនទាន់និយាយអ្វីច្រើនទេ គ្រាន់តែបង្ហើរពាក្យប៉ុន្មានម៉ាត់ថា លោកស្វាគមន៍ជានិច្ច បើស៊ិនធិ ចង់ជជែកតទល់គ្នា ក្នុងកម្មវិធីណាមួយ៕

ប្រភព៖ Amarin TV & Thai Newsroom