မြန်မာ့ဂုဏ် သတင်းမီဒီယာ

ပြည်ထောင်စုလွှတ်တော်နာယက ဦးအောင်လင်းဒွေး ဘယ်လာရုစ်အထက်လွှတ်တော်ဥက္ကဋ္ဌနှင့် တွေ့ဆုံဆွေးနွေး

October 22th

ဘယ်လာရုစ်နိုင်ငံ၊ မင့်စ်မြို့တွင် ၂၀၂၆ ခုနှစ် အောက်တိုဘာ ၂၁ ရက်က ပြည်ထောင်စုလွှတ်တော်နာယက၊ အမျိုးသားလွှတ်တော်ဥက္ကဋ္ဌ ဦးအောင်လင်းဒွေးသည် ဘယ်လာရုစ်သမ္မတနိုင်ငံ အမျိုးသားလွှတ်တော် အထက်လွှတ်တော်ဥက္ကဋ္ဌ မစ္စစ် နာတာလျာ ကိုချန်နိုဗာနှင့် တွေ့ဆုံဆွေးနွေးခဲ့သည်။

တွေ့ဆုံဆွေးနွေးရာတွင် မြန်မာနိုင်ငံနှင့် ဘယ်လာရုစ်နိုင်ငံတို့အကြား ၁၉၉၉ ခုနှစ် စက်တင်ဘာ ၂၂ ရက်တွင် သံတမန်ဆက်ဆံရေး ထူထောင်ခဲ့မှု၊ နှစ်နိုင်ငံအကြား အပြန်အလှန်ယုံကြည်မှုနှင့် နားလည်မှုအပေါ် အခြေခံသည့် ဆက်ဆံရေးများ တိုးတက်လာမှုတို့ကို ဆွေးနွေးခဲ့ကြသည်။

ထို့ပြင် ၂၀၂၆-၂၀၂၈ ခုနှစ် ပူးပေါင်းဆောင်ရွက်ရေး လမ်းပြမြေပုံအကောင်အထည်ဖော်ရေး၊ လွှတ်တော်ချင်း ပူးပေါင်းဆောင်ရွက်မှု တိုးမြှင့်ရေး၊ လွှတ်တော်ရေးရာ အတွေ့အကြုံများ ဖလှယ်ရေးနှင့် နိုင်ငံတကာလွှတ်တော်ဖိုရမ်များတွင် ပူးပေါင်းဆောင်ရွက်ရေးတို့ကိုလည်း ဆွေးနွေးခဲ့ကြသည်။

တွေ့ဆုံဆွေးနွေးမှုအပြီးတွင် မြန်မာနိုင်ငံ အမျိုးသားလွှတ်တော်နှင့် ဘယ်လာရုစ်နိုင်ငံ အမျိုးသားလွှတ်တော် အထက်လွှတ်တော်တို့အကြား ပူးပေါင်းဆောင်ရွက်ရေး နားလည်မှုစာချွန်လွှာကို ဦးအောင်လင်းဒွေးနှင့် မစ္စစ် နာတာလျာ ကိုချန်နိုဗာတို့ လက်မှတ်ရေးထိုးခဲ့ကြသည်။
#Myanmagon

ပြင်းထန်အယ်လ်နီညိုအတွက် ကြိုတင်ပြင်ဆင်ရေးနှင့် လောင်းလုံးမြို့နယ် ပြန်လည်ထူထောင်ရေးလုပ်ငန်းများ အရှိန်အဟုန်ဖြင့် ဆောင်ရွက်ရန် တိုင်းဒေသကြီးဝန်ကြီးချုပ် ပြောကြား

ထားဝယ်၊ အောက်တိုဘာ ၂၂

ပြင်းထန်အယ်လ်နီညို (Super El Niño) ဖြစ်စဉ်အတွက် ကြိုတင်ပြင်ဆင်ရေးနှင့် သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့ လုပ်ငန်းညှိနှိုင်းအစည်းအဝေးကို အောက်တိုဘာ ၂၂ ရက် နေ့လယ်ပိုင်းတွင် ထားဝယ်မြို့ရှိ တိုင်းဒေသကြီးအစိုးရအဖွဲ့ရုံး အစည်းအဝေးခန်းမ၌ ကျင်းပခဲ့သည်။

အစည်းအဝေးတွင် တိုင်းဒေသကြီးဝန်ကြီးချုပ်က ယခုနှစ် နိုဝင်ဘာနှင့် ဒီဇင်ဘာလများတွင် အမြင့်ဆုံးအခြေအနေသို့ ရောက်ရှိလာနိုင်သည့် ပြင်းထန်အယ်လ်နီညိုဖြစ်စဉ်ကြောင့် မိုးခေါင်ရေရှားမှုအပါအဝင် ဆက်စပ်အန္တရာယ်များကို ဒေသအလိုက် ကြိုတင်ပြင်ဆင်ဆောင်ရွက်ထားရန် လိုအပ်ကြောင်း ပြောကြားခဲ့သည်။

ပြင်းထန်အယ်လ်နီညိုဖြစ်စဉ်ကြောင့် မိုးရွာသွန်းမှုနှင့် မုန်တိုင်းဖြစ်ပေါ်မှုများ မူမမှန်ခြင်း၊ လာမည့်ဆောင်းရာသီနှင့် နွေရာသီတို့တွင် အပူချိန်လွန်ကဲစွာ မြင့်တက်လာခြင်းတို့ ဖြစ်ပေါ်နိုင်သဖြင့် စိုက်ပျိုးမွေးမြူရေး၊ စားနပ်ရိက္ခာဖူလုံရေးနှင့် ပြည်သူ့ကျန်းမာရေးကဏ္ဍများတွင် သက်ရောက်မှုများရှိလာနိုင်ကြောင်း ၎င်းက ပြောကြားသည်။

ထို့ကြောင့် ရေအရင်းအမြစ်များကို ကြိုတင်စိစစ်ထိန်းသိမ်းခြင်း၊ သောက်သုံးရေပြတ်လပ်မှုမရှိစေရေး စီမံခြင်းနှင့် ရက်တိုမျိုးစပါးများ ကြိုတင်စုဆောင်းထားရှိခြင်းတို့ကို သက်ဆိုင်ရာဌာနများ ပူးပေါင်း၍ အချိန်မီဆောင်ရွက်ထားရန် လိုအပ်ကြောင်း၊ အပူဒဏ်ကြောင့် ဖြစ်ပွားတတ်သည့် ရောဂါများနှင့် ရေရှားပါးမှုမှတစ်ဆင့် ကူးစက်တတ်သည့် ဝမ်းပျက်ဝမ်းလျှောရောဂါများကို ကာကွယ်နိုင်ရေးအတွက် ကလေးသူငယ်များ၊ သက်ကြီးရွယ်အိုများနှင့် ပြင်ပတွင် အလုပ်လုပ်ကိုင်နေရသူများကို ဦးစားပေးစောင့်ရှောက်ရန်လည်း ပြောကြားခဲ့သည်။

ထို့ပြင် စက်တင်ဘာ ၂၆ ရက်မှ ၂၉ ရက်အထိ မိုးသည်းထန်စွာရွာသွန်းမှုကြောင့် ရေကြီးရေလျှံမှုနှင့် မြေပြိုမှုများ ကြုံတွေ့ခဲ့ရသည့် လောင်းလုံးမြို့နယ်အတွင်း ပြန်လည်ထူထောင်ရေးလုပ်ငန်းများကို လုံခြုံရေးတပ်ဖွဲ့ဝင်များ၊ မီးသတ်တပ်ဖွဲ့၊ ဌာနဆိုင်ရာများနှင့် ပရဟိတအဖွဲ့များ စုစုပေါင်းအင်အား ၂,၄၁၁ ဦး၊ ယန္တရား ၉၈ စီးဖြင့် ဆောင်ရွက်လျက်ရှိကြောင်း သိရသည်။

ထပ်မံပြိုကျနိုင်ခြေရှိသည့် ကျေးရွာများတွင် ကျွမ်းကျင်ပညာရှင်များက မြေပြင်အခြေအနေကို ဘူမိနည်းပညာဆိုင်ရာ စစ်ဆေးအကဲဖြတ်မှု (Geotechnical Survey) ပြုလုပ်ပြီးနောက် ဘေးသင့်ပြည်သူများအတွက် ဘေးကင်းလုံခြုံသည့် နေရာများ (Safe Zone) တွင် နေအိမ်များ ပြန်လည်တည်ဆောက်ပေးသွားမည်ဖြစ်ကြောင်း တိုင်းဒေသကြီးဝန်ကြီးချုပ်က ပြောကြားခဲ့သည်။

ယင်းသို့ ပြန်လည်ထူထောင်ရေးဆောင်ရွက်ပေးမည့် အခြေအနေများကို ဒေသခံဘေးသင့်ပြည်သူများ သေချာစွာသိရှိနိုင်ရေး သတင်းမှန်များကို အစဉ်မပြတ် ရှင်းလင်းတင်ပြပေးရန်လည်း အရေးကြီးကြောင်း ၎င်းက ဆိုသည်။

ဘေးအန္တရာယ်ကြောင့် ထိခိုက်ဆုံးရှုံးမှုစာရင်းများကို အစိုးရနှင့် ပုဂ္ဂလိကကဏ္ဍအလိုက် မြေပြင်တွင် တိကျမှန်ကန်စွာ ဆက်လက်စိစစ်ကောက်ယူရန် လိုအပ်ကြောင်း၊ သဘာဝဘေးပြန်လည်ထူထောင်ရေးလုပ်ငန်းများကို လုပ်ထုံးလုပ်နည်းများနှင့်အညီ အရေးပေါ်ကာလ၊ ကာလလတ်နှင့် ကာလရှည်ဟူ၍ စနစ်တကျ အကောင်အထည်ဖော်ဆောင်ရွက်ကာ ဒေသခံပြည်သူများ၏ လူမှုစီးပွားဘဝများ ပုံမှန်အခြေအနေသို့ အမြန်ဆုံးပြန်လည်ရောက်ရှိစေရေး သက်ဆိုင်ရာဌာနများနှင့် လူမှုအဖွဲ့အစည်းများအားလုံးက တာဝန်ယူမှုအပြည့်ဖြင့် ဝိုင်းဝန်းကြိုးပမ်းဆောင်ရွက်ကြရန် တိုင်းဒေသကြီးဝန်ကြီးချုပ်က တိုက်တွန်းမှာကြားခဲ့ကြောင်း သိရသည်။
#Myanmagon

ဒုတိယသမ္မတ ဒေါ်နန်းနီနီအေး မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ ပြင်ဆင်မှုများ ကြည့်ရှုစစ်ဆေး

နေပြည်တော်၊ အောက်တိုဘာ ၁၈

ဒုတိယသမ္မတ ဒေါ်နန်းနီနီအေးသည် ပြည်ထောင်စုဝန်ကြီး ဦးခင်မောင်စိုး၊ နေပြည်တော်ကောင်စီဥက္ကဋ္ဌ ဦးကံမြင့်သန်းနှင့် တာဝန်ရှိသူများလိုက်ပါလျက် ယနေ့မွန်းလွဲပိုင်းတွင် ၂၀၂၆ ခုနှစ် (၂၇) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ အောင်မြင်စွာကျင်းပနိုင်ရေး ပြင်ဆင်ဆောင်ရွက်ထားမှုများကို ကြည့်ရှုစစ်ဆေးပြီး လိုအပ်သည်များ မှာကြားခဲ့သည်။

ဒုတိယသမ္မတသည် ပြိုင်ပွဲကျင်းပမည့် MICC-I၊ အမျိုးသားစာကြည့်တိုက်၊ အမျိုးသားပြတိုက်၊ နေပြည်တော်တည်းခိုရေးစခန်းနှင့် မြို့တော်ခန်းမရှိ လေဟာပြင်ဇာတ်ရုံတို့၌ ခန်းမများ၊ မီးနှင့်အသံစနစ်များ၊ ကျန်းမာရေးစောင့်ရှောက်မှု၊ နေရာထိုင်ခင်း၊ စားသောက်ရေးနှင့် ပြိုင်ပွဲဝင်များအတွက် လိုအပ်သည့်အစီအမံများ ပြင်ဆင်ထားရှိမှုကို စစ်ဆေးခဲ့သည်။

ပြိုင်ပွဲဝင်များနှင့် အကဲဖြတ်ဒိုင်များ အဆင်ပြေစွာ နေထိုင်ယှဉ်ပြိုင်နိုင်ရေး၊ အခမ်းအနားနှင့် ပြိုင်ပွဲများ စနစ်တကျကျင်းပနိုင်ရေး၊ ကျန်းမာရေးနှင့် သန့်ရှင်းရေးလုပ်ငန်းများကို အလေးထားဆောင်ရွက်ရန် ဒုတိယသမ္မတက မှာကြားခဲ့သည်။

အဆိုပါပြိုင်ပွဲကို အောက်တိုဘာ ၂၁ ရက်မှ ၂၉ ရက်အထိ ကျင်းပသွားမည်ဖြစ်ပြီး တိုင်းဒေသကြီးနှင့် ပြည်နယ်များမှ ပြိုင်ပွဲဝင် ၂,၄၀၀ ကျော် ပါဝင်ယှဉ်ပြိုင်ကြမည်ဖြစ်ကြောင်း သိရသည်။
#Myanmagon

ပဲခူးတိုင်း တရားမဝင်ကုန်သွယ်မှုတိုက်ဖျက်ရေး လုပ်ငန်းညှိနှိုင်းအစည်းအဝေး ကျင်းပ

ပဲခူး ဩဂုတ် ၂၄

ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ လုပ်ငန်းညှိနှိုင်းအစည်းအဝေးကို ဩဂုတ် ၂၄ ရက် မွန်းလွဲပိုင်းက ပဲခူးတိုင်းဒေသကြီးအစိုးရအဖွဲ့ရုံး Video Conferencing ခန်းမ(၁)၌ ကျင်းပခဲ့သည်။

အစည်းအဝေးတွင် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ညီလန်းချိုက တရားမဝင်ကုန်သွယ်မှုတိုက်ဖျက်ရေး မူဝါဒနှင့် မဟာဗျူဟာများကို ပုံမှန်စောင့်ကြည့်အကဲဖြတ်ပြီး လိုအပ်ပါက ပြန်လည်သုံးသပ်ရန်၊ နယ်စပ်ဝင်ထွက်ဂိတ်များ၊ သိုလှောင်ရာနေရာများ၊ ကုန်သွယ်မှုလမ်းကြောင်းများနှင့် ဈေးကွက်များတွင် တရားမဝင်ကုန်စည် သိုလှောင်၊ သယ်ယူဖြန့်ဖြူးမှုများကို ထိရောက်စွာ ဖော်ထုတ်စစ်ဆေးရန် လမ်းညွှန်မှာကြားခဲ့သည်။

ထို့အပြင် ရှောင်ကွင်းလမ်းကြောင်းများမှ တရားမဝင်ကုန်စည်များ ဖြတ်သန်းသယ်ဆောင်မှု မရှိစေရေး လက်တွေ့ကျသည့် အစီအမံများ ချမှတ်ရန်နှင့် ဖမ်းဆီးရမိသည့် မော်တော်ယာဉ်နှင့် ပစ္စည်းများ အပ်နှံရာတွင် နှောင့်နှေးမှုကြောင့် ပျက်စီးဆုံးရှုံးမှု မဖြစ်ပေါ်စေရေး စနစ်တကျဆောင်ရွက်ရန် မှာကြားခဲ့သည်။

ယင်းနောက် အထူးအဖွဲ့ဝင်များက တရားမဝင်ကုန်သွယ်မှုတိုက်ဖျက်ရေး လက်ရှိဆောင်ရွက်နေမှုများကို ဆွေးနွေးတင်ပြခဲ့ကြပြီး ဝန်ကြီးက နိဂုံးချုပ်အမှာစကား ပြောကြားခဲ့ကြောင်း သိရသည်။
#Myanmagon