National News

၄၉၂၆ စစ်ဆင်ရေးမှသည်
--------------
(၇-၉-၂၀၂၆)

စက်တင်ဘာလ ၄ ရက်နေ့က စပြီး ရခိုင်ဘက်ကို စစ်ဆင်ရေး သိသိသာသာ အရှိန်မြင့်တင်တာနဲ့ ပတ်သက်ပြီး ၄၉၂၆ စစ်ဆင်ရေးလို့ တပ်ဘက်ထောက်ခံသူတွေ ကြားထဲ နာမည်ကြီးနေတယ်။

ဒီ အမည်နာမက တရားဝင် ဟုတ်ချင်မှလည်း ဟုတ်မှာပေါ့။ ဒါပေမယ့် တပ်မတော်သားတွေ စိတ်ထဲ နာနာကျည်းကျည်းဖြစ်ခဲ့ကြတဲ့ ၁၀၂၇ စစ်ဆင်ရေးကို မကျေခဲ့သမျှ ပြန်နွှဲလိုတဲ့ စိတ်တွေက တော်တော်များများမှာ ရှိနေကြလေတော့ ၄၉၂၆ ဟာ တပ်ထောက်ခံသူတွေကြား နှစ်ထောင်းအားရဖြစ်ကြမှာ မလွဲပါဘူး။

၄၉၂၆ နဲ့အတူ တစ်ဖက်မှာလည်း ဗန်းမော်ဘက် စစ်ရေယာဉ်တွေ ရောက်ရှိသွားတာကလည်း KIA တွေအတွက် ရတက်မအေးစရာဖြစ်နေတယ်။
ဒါဟာ အခု အစိုးရသစ်တက်လာတဲ့ ရက် ၁၀၀ စီမံကိန်းတွေအပြီး တပ်မတော်ကာကွယ်ရေးဦးစီးချုပ်အသစ်ကို အပြောနဲ့ အလုပ် ညီအောင်လုပ်ပြနေသလားလို့ မေးချင်စရာပါပဲ။

ရေးခဲ့ကြသလို ရက် ၁၀၀ အတွင်းမှာ လက်နက်ကိုင်တွေနဲ့ ငြိမ်းချမ်းရေးဆွေးနွေးပွဲတွေ ဖိတ်ခေါ်ခဲ့ပေမယ့် KIA,AA, KNU စတဲ့ EAO ဂျိုးတွေကတော့ နေပြည်တော်ကို မလာခဲ့ကြပါဘူး။

မလာတော့ ဘာဖြစ်လဲဆိုရင် ငယ်ငယ်တုန်းက အိပ်ယာကနေ နှိုးမရတဲ့အခါ မွေးသမိခင်ကြိမ်းသလို “မင်းမလာရင် ငါလာပြီ” ဆိုပြီး တုတ်နဲ့ လာမယ့် ကိန်းမျိုး ဆိုက်တာပေါ့။ ဒီတစ်ခေါက်မှာ ၄၉၂၆ ရော ကချင်ဘက်က စစ်သင်္ဘောတွေရောဟာ ဆိုက်ဝါးတစ်ခုထက် ပိုတဲ့ အရွေ့ဆိုတာကို အနီအားပေးတွေရဲ့ သတင်းစာမျက်နှာတွေကြည့်ရုံနဲ့ သိသာနေပါတယ်။

စင်းခမ်း တံတားကို အောက်ကနေမိုင်းထောင်ဖျက်စီး၊ ခေတ်သစ်တို့ ဧရာဝတီတို့ကနေ လေကြောင်းတိုက်ခိုက်မှုလို့ အော်၊ ပုံတွေကြည့်လိုက်တော့ အောက်က မိုင်းနဲ့ခွဲထားတဲ့ပုံတွေနဲ့ AI သုံးထားတဲ့ပုံတွေ။ ပလောင်တွေ ဂုတ်ထိပ်ချိုးတုန်းက အကွက်တွေ မြင်နေရပြီဆိုတော့ မကြာခင် တပ်ကအဲ့နေရာကို ရောက်လာတော့မယ့် သဘောလို့ မှတ်ယူနိုင်ပါတယ်။

နိုင်ငံတကာ ဆက်ဆံရေးဘက်မှာ ပထမဆုံး အိန္ဒိယနိုင်ငံခရီးစဉ်ကနေ အခုနောက်ဆုံး ဗီယက်နမ်၊ နောက်အပတ်မှာ ကမ္ဘောဒီးယား အထိ အောင်မြင်နေတာမို့ အနည်းငယ် စိတ်အေးသွားရပြီဖြစ်ပေမယ့် ပြည်တွင်းအေးချမ်းရေးကိုလည်း တစ်နိုင်ငံလုံးအတိုင်းအတာနဲ့ ဖြစ်လာစေချင်ပါတယ်။

EAO တွေနဲ့ တစ်ပွဲတစ်လမ်း အကဲစမ်းတာအပြင် ပြည်သူတွေကြားထဲက လက်နက်ကိုင် ဓားပြတွေကိုလည်း ရှင်းလင်းဖို့က လိုသေးတယ်။ အစကတော့ တော်လှန်ရေးအကြောင်းပြပြီး လက်နက်ကိုင်တာ၊ နောက်မှ ဓားပြတွေဖြစ်သွားတဲ့ ပဒက်အဖွဲ့တွေကိုလည်း တပ်၊ ရဲ၊ ပြည်သူ အားလုံးပူးပေါင်းနှိမ်နင်းရဦးမယ်။

ဒါကြောင့် အခု ၄၉၂၆ လို့ နာမည်ကြီးနေတဲ့ စစ်ဆင်ရေးတစ်ခုကနေ တစ်နိုင်ငံလုံးခြုံငုံပြီး ဘယ်အနေအထားထိ သွားနိုင်မလဲ၊ ဘယ်လိုစီမံကိန်းတွေရှိနေမလဲ ဆိုတာကတော့ ပိတ်ကားပြင်ကနေ ဆက်လက်စောင့်ကြည့်ရမှာပါ။

(ပိုင်စိုး)

ရှက်လို့ အိမ်ပြန်ချင်သူ
=============

ညကတည်းက ငနဲသား ပျော်နေတာ မနက်လင်းတဲ့အထိ အိပ်မပျော်ခဲ့ဘူး။ ဒီရက်ပိုင်း အပျော်တွေဟာ ဆက်တိုက်ဆိုသလို ငနဲသားဆီ လာနေတော့တာပါ။ ငနဲသားက အတိုင်းအဆမရှိ ပျော်နေသလောက် ငနဲသားရဲ့ ဆရာကတော့ မှိုင်တွေနေတော့တာပါ။ အရက်တန်ခိုးနဲ့ အခိုးအငွေ့တွေပျံနေသလားတော့ မပြောတတ်ဘူး‌ပေါ့။

"ဟေ့ကောင်... ဘယ်လိုတွေတောင် ပျော်နေတာလဲကွ၊ ဘယ်မလဲ ကော်ဖီ"

မိုးမလင်းသေးဘူး အကုသိုလ်သံတွေ စကြားရပြီလို့ ငနဲသား တွေးလိုက်မိတော့တယ်။ ပျော်နေတာလေးတောင် ဘယ်ရောက်သွားတယ်မသိဘူး။ ငနဲသားဟာ ပျော်ရွှင်နေတာနဲ့ ဆရာအဘိုးကြီးကို ကော်ဖီဖျော်တိုက်ဖို့ မေ့နေတယ်။ အဘိုးကြီး အော်တော့မှ ကမန်းကတမ်း ကော်ဖီပြေးဖျော်‌တော့တာ။

"ဟေ့ကောင် မင်းကို ကြည့်ရတာ ဒီရက်ပိုင်း တအားတွေ ပျော်နေသလိုပဲနော်၊ ဘာတွေများ ပျော်စရာရှိလဲကွ၊ ပြောစမ်းပါဦး"

အဘိုးကြီးက လေသံမာမာနဲ့ ပြောပေမယ့် ငနဲသားက အပြုံးမပျက်ပါဘူး။

"ဟာ ဘဘကလဲ၊ ခုဆိုရင် ဘဘမြင့်လဲ လွတ်လာပြီ၊ မေမေစုလဲ နေအိမ်ပြန်ရောက်ပြီ၊ ဒီထက်ပျော်စရာကောင်းတာ ဘာရှိဦးမလဲ၊ ပြီးတော့ ကျုပ်လဲ အိမ်ပြန်ခွင့်ရတော့မယ်လေ၊ ဘဘကော မပျော်ဘူးလား"

ငနဲသားက ကော်ဖီဖျော်ရင်း ဖြေလိုက်တော့ အဘိုးကြီးက ငနဲသားဆီ ခပ်သုတ်သုတ် လျှောက်လာပါတယ်။ ငနဲသား တအံ့တဩဖြစ်နေချိန်မှာပဲ အဘိုးကြီးက ငနဲသားရဲ့ခေါင်းကို ဒေါက်ခနဲ ခေါက်တယ်။

"ဘာလို့ပျော်ရမလဲကွ၊ အဲဒါ ငါတို့ ထမင်းငတ်ကိန်းဆိုတာ မင်း မသိဘူးလား၊ ငါတို့မှာ သူတို့ကို အကြောင်းပြပြီး အလှူခံ စားနေရတာ၊ အခု သူတို့လွတ်လာတော့ အလှူခံစားဖို့ ခေါင်းစဉ်ပျောက်သွားပြီ၊ အဲဒါကြောင့် ငါတို့တွေ စိတ်ညစ်နေရတာကို မင်းက ပျော်တောင်နေသေးတယ်၊ မင်းဆိုတဲ့‌ကောင် တော်တော်တုံးပါလားကွ... ဟေ"

အဘိုးကြီးက စိတ်ဆိုးမာန်ဆိုး ပြောဆိုပြီးနောက် ငနဲသား လက်ထဲက ကော်ဖီခွက်ကို ဆတ်ခနဲ လှမ်းယူတယ်။ အဘိုးကြီးက ဘာစိတ်ကူးပေါက်တယ်မသိဘူး၊ ခြေနှစ်လှမ်း လှမ်းပြီးတော့ တုန့်ခနဲ ရပ်တယ်။ ငနဲသားကို လှည့်ကြည့်တယ်။

"နေစမ်းပါဦး... မင်းက ဘာလို့ အိမ်ပြန်ချင်ရတာလဲ၊ ငါတို့နဲ့ နေရတာ မပျော်ဘူးလား"

ငနဲသားက အဘိုးကြီးကို တည့်တည့်ကြီး ကြည့်လိုက်တယ်။

"ကျုပ်ရည်ရွယ်ချက်က ဘဘမြင့်တို့ ပြန်လွတ်လာရင် အိမ်ပြန်မယ်လို့ ဆုံးဖြတ်ထားတာ၊ ပြီးတော့ ခင်ဗျားတို့နဲ့ နေရတာ ကျုပ် ရှက်တယ်၊ ခင်ဗျားတို့က အားအားရှိ အလှူပဲ ခံနေတော့ာတာ၊ ပြောရင်တော့ လေတစ်လုံး မိုးတစ်လုံးနဲ့၊ ပြီးရင်တော့ ပြည်သူတွေဆီက မသထာ ရေစာ တွေပဲ စားနေကြတယ်၊ ခင်ဗျားတို့မရှက်ပေမယ့် ကျုပ် ရှက်တယ်၊ အဲဒါကြောင့် ကျုပ် အိမ်ပြန်ချင်တာ"

"ဖီ"

ကော်ဖီကို ဟန်ပါပါ ဇိမ်ခံသောက်နေတဲ့ အဘိုးကြီးဟာ ငနဲသားကို ပြူးပြီးကြည့်နေရာကနေ ကော်ဖီတွေကို ထွေးထုတ်တယ်။

"မင်းကော်ဖီကလဲ ခါးလိုက်တာကွာ"

"ခါးမှာပေါ့ဗျ၊ ခင်ဗျား သကြားမှ ဝယ်မပေးတာ"

"ဝယ်မပေးတာမဟုတ်ဘူးဟ၊ ဝယ်စရာ ပိုက်ဆံမရှိတာ လခွမ်း"

အဘိုးကြီးဟာ သကြားမပါတဲ့ ကော်ဖီခါးခါးကြီးကို မျက်လုံးစုံမှတ်ပြီး သောက်နေပါတယ်။ ကြည့်ရတာ တော်တော်လေး ငတ်နေပုံပါပဲ။ ငနဲသားကတော့ ဒီအဘိုးကြီးတွေ ‌သကြားဝယ်ဖို့ ကမ်ပိန်းတွေ ဘာတွေ လုပ်နေဦးမလားဆိုပြီး အတွေးနဲ့ ပြုံးလိုက်မိပါသေးတယ်။

https://t.me/kolupho26
(၁-၅-၂၀၂၆)